ཕྱུགས་རྫི་ཞིག་ནས་རྒྱལ་ཡོངས་ལ་གྲཊ་པའི་བོད་ཕྲུག་རིན་ཆེན་དོན་འགྲུབ།

ལོན་ཏོན་ཨོ་རྩལ་འགྲན་ཚོགས་ཀྱི་སྤྱི་ལེ20ཡི་འདུར་རྒྱུག་འགྲན་སྡུར་གྱི་ཨང་གཉིས་པ་ཆོས་དབྱིངས་སྐྱིད་དང2017ལོའི་རྒྱལ་ཡོངས་ལུས་རྩལ་འགྲན་ཚོགས་ཀྱི་མ་ལ་སུང་རྒྱང་རྒྱུག་འགྲན་སྡུར་གྱི་ཨང་གཉིས་པ་མཚོ་མོ་སྐྱིད། 2019ལོར་ཁྲང་པེ་རི་བོའི་རྒྱལ་ཡོངས་ཀྱི་འདུར་རྒྱུག་འགྲན་སྡུར་གྱི་ཨང་དང་པོ་བཀྲ་ཤིས་གཡང་འབུམ། 2018ལོའིUTMBའགྲན་རའི་ཨང་དང་པོ་ལེན་མཁན་ཐོག་མ་རྒྱལ་ཏོག་ནོར་བུ་རྒྱལ་སོགས་མིང་དུ་གྲགས་པའི་ལུས་རྩལ་པ་འདི་དག་ལ་མཚོ་བྱང་གི་རིགས་སོ་སོའི་མང་ཚོགས་ཚང་མ་རྒྱུས་མངའ་ཡོད་པ་དང་། མཚོ་སྔོན་ཞིང་ཆེན་དང་ཐ་ན་རྒྱལ་ནང་དུའང་མི་མང་པོར་རྒྱུས་མངའ་ཡོད། ཁོང་ཚོ་ཚང་མ་མཚོ་བྱང་གི་ཡིན་པ་དང་མཚོ་བྱང་གི་ས་གཞི་ཆེན་མོའི་ཐོག་འཚར་ལོངས་བྱུང་ནས་མཚོ་བྱང་ལ་ལུས་རྩལ་གྱི་མཚན་སྙན་ཆེན་པོ་བསྩལ་བ་རེད། དེ་བས། མཚོ་བྱང་ནི་མཚོ་སྔོན་ཞིང་ཆེན་ལུས་རྩལ་རྣམ་གྲངས་ཀྱི“གསེར་གྱི་རྟགས་མའི་ཕ་ས”ཡིན་ཞེས་བརྗོད་ཆོག་ཆོག་རེད།

གསེར་ས་འོག་ཏུ་སོང་ཡང་འོད་ནམ་མཁར་ཁྱབ་ཅེས་པ་ལྟར། རིན་ཆེན་དོན་འགྲུབ་གླེང་ཡོང་ཚེ། མཚོ་བྱང་ཁུལ་ལས་ཞོར་ལུས་རྩལ་སློབ་གྲྭའི་སློབ་གཙོ་གཞོན་པ་ཚེ་རིང་ནོར་བུས་ད་ལྟ་ད་དུང་ཐོག་དང་པོར་རིན་ཆེན་དོན་འགྲུབ་ལ་ལུས་རྩལ་ཐད་ལྷན་སྐྱེས་ཀྱི་ཤེས་རབ་ལྡན་པའི་རྣམ་པ་གསལ་བོར་དྲན་གྱིན་འདུག 2015ལོར་རིན་ཆེན་དོན་འགྲུབ་ཀྱིས་མཚོ་བྱང་ཁུལ་གྱི་ཚབ་བྱས་ཏེ་མཚོ་སྔོན་ཞིང་ཆེན་གྲངས་ཉུང་མི་རིགས་ཀྱི་སློབ་འབྲིང་སློབ་མའི་ལུས་རྩལ་འགྲན་ཚོགས་སྐབས་གསུམ་པར་ཞུགས་ནས། སྐྱེས་པའི་རྒྱང་རྒྱུག་སྨི3000ཅན་དང10000ཅན་གཉིས་ཀྱི་ཨང་དང་པོ་བླངས་པ་རེད། ཁོ་ཐེངས་དང་པོར་འགྲན་སྡུར་ལ་ཞུགས་ནས་སྤྱིར་བཏང་མིན་པའི་གྲུབ་འབྲས་དེ་འདྲ་བླངས་པ་ནི་དངོས་གནས་ཧང་སངས་དགོས་པ་ཞིག་རེད། དེའི་ཕྱིར་རིན་ཆེན་དོན་འགྲུབ་ལ་རྩལ་ཁྲིད་དགེ་རྒན་ཚེ་རིང་ནོར་བུས་ཀྱང་དོ་སྣང་དཔེ་མེད་བྱས། 2018ལོར་ཁོ་མཚོ་སྔོན་ཞིང་ཆེན་གྱི་རུ་ཁག་ཏུ་འོས་སྦྱོར་བྱས་ནས་རྩལ་ཁྲིད་དགེ་རྒན་སུའུ་ཝེ་དང་མཉམ་དུ་ཚད་ལྡན་ངང་རྒྱང་རྒྱུག་སྦྱོང་བརྡར་བྱས། སྦྱོང་བརྡར་བྱེད་པའི་རིང་ལུས་ཕུང་གི་དབང་གིས་སྦྱོང་བརྡར་བྱེད་མཚམས་བཞག་མོད། འོན་ཀྱང་མཐར་ཁོས་རྒྱུན་འཁྱོངས་བྱས་པར་མ་ཟད། ཁྱད་དུ་འཕགས་པའི་རྒྱང་རྒྱུག་གི་ལྷན་སྐྱེས་ནུས་པ་མངོན་པར་བྱས། དེའི་རྗེས་ཁོ་མཚོ་སྔོན་ཞིང་ཆེན་ལུས་རྩལ་ལས་དོན་རུ་ཁག་ཏུ་ཞུགས་ནས་དེ་ལས་ལྷག་པའི་ཆེད་ལས་ཀྱི་སྦྱོང་བརྡར་བྱེད་མགོ་བརྩམས། ལོ་གཅིག་གི་ཆེད་ལས་སྦྱོང་བརྡར་བརྒྱུད་རྗེས། 2019ལོ་ནས་བཟུང་རིན་ཆེན་དོན་འགྲུབ་རྒྱལ་ཡོངས་རང་བཞིན་གྱི་འགྲན་སྡུར་ཁག་ཅིག་ཏུ་ཞུགས་ཏེ། རྒྱལ་ཡོངས་ཀྱི་ན་གཞོན་ལུས་རྩལ་འགྲན་ཚོགས་སྐབས་གཉིས་པའི་སྨི10000ཡི་འགྲན་སྡུར་ཁྲོད་རྒྱལ་ཁའི་ངང་རྟིང་རྩོད་དུ་ཚུད་པ་དང་། 2019ལོའི་ཞི་ཨན་ལམ་ཕྱེད་མ་ལ་སུང་རྒྱང་རྒྱུག་གི་གཟེངས་རྟགས་འགྲན་སྡུར་སྟེང་ཁོ་ལ་སྐར་མ68དང་སྐར་ཆ27གྱི་ཕུལ་བྱུང་གྲུབ་འབྲས་ཐོབ། 2019ལོར་ཧུང་ཀུའུ་ལམ་ཕྱེད་མ་ལ་སུང་རྒྱང་རྒྱུག་འགྲན་སྡུར་སྟེང་སྐར་མ68དང་སྐར་ཆ33གྱི་གྲུབ་འབྲས་ཐོག་ནས་ཨང་གཉིས་པ་བླངས། 2019ལོར་ཅན་ཉན་ཆུ་ཚན་མཐོ་སྒང་རྒྱལ་སྤྱིའི་ལམ་ཕྱེད་མ་ལ་སུང་རྒྱང་རྒྱུག་འགྲན་སྡུར་སྟེང་སྐར་མ68དང་སྐར་ཆ25ཡི་གྲུབ་འབྲས་ཐོག་ནས་ཨང་གསུམ་པ་བླངས། 2020ལོར་ལན་ཀྲིག་འབྲོང་ཡུལ་ལམ་ཕྱེད་མ་ལ་སུང་རྒྱང་རྒྱུག་འགྲན་སྡུར་ཐོག་ཨང་གཉིས་པ་བླངས། ལོ་དེར་ཡུན་ནན་ཡུས་ལུང་ཝན་ལམ་ཕྱེད་མ་ལ་སུང་རྒྱང་རྒྱུག་འགྲན་སྡུར་ཁྲོད་ཨང་གསུམ་པ་བླངས། འདི་ལྟར་ཉིན་ནས་མཚན་དང་དབྱར་ནས་དགུན་ལ་དགེ་རྒན་གྱི་རེ་བ་སྟོང་ཟད་དུ་མ་བཏང་ཞིང་རང་ཉིད་ཀྱི་དཀའ་སྡུག་ཀྱང་ཆུད་ཟོས་སུ་བཏང་མྱོང་མེད་པས། མཚོ་བྱང་རྩྭ་ཐང་ནས་ཡོང་བའི་ཕྱུགས་རྫི་ཆུང་ཆུང་ཞིག་རྩལ་ཁྲིད་དགེ་རྒན་ཚན་ཆུང་གི་གཅེས་སྐྱོང་མཛུབ་ཁྲིད་དང་རང་གི་དཀའ་སྤྱད་སྙིང་རུས་ལ་བརྟེན་ནས་རྒྱལ་ནང་གི་མ་ལ་སུང་རྒྱང་རྒྱུག་འགྲན་སྡུར་གྱི“00རྗེས་ཀྱི་འགྲན་ཞུགས་པ་དཔེ་མེད”ཅིག་ཏུ་གྱུར།

སྐབས་བཅུ་བཞི་བའི་རྒྱལ་ཡོངས་ལུས་རྩལ་འགྲན་ཚོགས་ཀྱི་མ་ལ་སུང་རྒྱང་རྒྱུག་འགྲན་སྡུར་མཇུག་སྒྲིལ་རྗེས་མི་དེ་བས་མང་བས་མཚོ་སྔོན་མཚོ་བྱང་ནས་ཡོང་བའི་བོད་རིགས་ཕོ་གསར་འདི་ངོ་ཤེས་པ་རེད། གསར་འགོད་པས་ཁོང་ལ་བཅར་འདྲི་བྱེད་སྐབས། ཕོ་གསར་ཁོས་དཔའ་སྤོབས་དང་ལྡན་པའི་ངང་ངས་རང་ཉིད་ཀྱི་འབད་བརྩོན་ལ་བརྟེན་ནས་རང་ལ་དོ་སྣང་དང་རྒྱབ་སྐྱོར་བྱེད་མཁན་རྣམས་ཀྱི་རེ་བ་ཆུད་ཟོས་སུ་མི་གཏོང་ཞིང་། མུ་མཐུད་དུ་དེ་བས་ལེགས་པའི་གྲུབ་འབྲས་བླངས་ནས་ཕ་ཡུལ་མི་དམངས་ལ་གཟི་བརྗིད་བརྩོན་ལེན་བྱ་འདོད་ཟེར།

གསར་འགོད་པས་ཁོ་ལ་ཁྱིམ་གྱི་གནས་ཚུལ་འདྲི་སྐབས། རིན་ཆེན་དོན་འགྲུབ་ཀྱིས་ནང་མི་དང་ཕ་ཡུལ་དྲན་ཚུལ་མང་དུ་བརྗོད་བྱུང་། མི་མང་ཆེ་བའི་འཚོ་བའི་ཁྲོད་ནང་མི་དང་མཉམ་དུ་འདུག་པ་ནི་རྒྱུན་ལྡན་ཡིན་མོད། འོན་ཀྱང་ཁོ་ལ་མཚོན་ན་དེ་ནི་དམིགས་ཚད་མཐོ་ལ་མངོན་འགྱུར་དཀའ་བ་ཞིག་རེད། ལུས་རྩལ་ལས་དོན་རུ་ཁག་ནང་ཞུགས་རྗེས་སྦྱོང་བརྡར་གྱི་ལས་འགན་ལྕི་ཞིང་འགྲན་སྡུར་སྣ་ཚོགས་ལ་ཞུགས་དགོས་པས། ཏག་ཏག་ལོ་གཉིས་རིང་ཕྱིར་ཁྱིམ་དུ་ལོག་ཐུབ་མེད། ཁྱིམ་མི་དང་མཉམ་དུ་འདུག་པའི་དུས་ཚོད་ནི་ཧ་ཅང་ཐུང་བས་ཁོས་དེ་ལ་གཅེས་སྤྲས་ལྡབ་འགྱུར་གྱིས་བྱེད་ཀྱིན་འདུག